تقريبا لما قررت أسمع كايروكي كنت بسمعهم من 2009 او قبلها من أيام ما كانوا بيعملوا كليبات من اللي هي الصور و فيديوهات بتاعه الحروب في أغنية “حلمي أنا” .. كنت متفائل بيهم خير جدا بغض النظر عن صوت أمير عيد اللي هو شخصيا مبيحبوش.
شهر 12 2010 حضرتلهم حفلة في إحتفالية فرقة وسط البلد للألبوم التاني ليهم و كان مشارك فيها “كايروكي” و كان أدائهم بالنسبة للأندرجروند مبهر جدا و ناضج على المسرح كعرض متكامل و شادد الجمهور و الناس اللي واقفين قدامهم.
بعد ثورة 25 إبتدى “كايروكي” يظهر في أغنية صوت الحرية و أغاني تانية مرتبطة بالثورة و من هنا كانت بداية إنتشارهم و تحولهم من باند أندرجروند لباند مشهور و الناس كلها شايفاه و بيطلع في الإعلام و يبقا ليه جمهور حقيقي.
أصدر كايروكي الألبوم الجديد “مطلوب زعيم” بتاعهم في صيف 2011 و كان بمثابة إنطلاقة لمزيكا و كلمات و ألحان جديدة تليق بشباب العصر دا اللي عاوز يتكلم بتحرر شوية اكتر و بيتكلم في مشاكل كتير مش بس في مواضيع محدده بعينها.
و من هنا بدأ الناس يسمعوا كايروكي بشكل أكبر عن طريق الألبوم و بعض الأغاني السينجل اللي نزلت في أحداث مختلفة زي “إثبت مكانك” و “يا الميدان” اللي كليبتها حققت نسب مشاهده عالية.
بدأ فريق “كايروكي” يعمل حفلات كتير جدا و بدأ فعلا يكون معروف لدى كتير من الناس و أصدر الألبوم التاني ليه و “أنا مع نفسي قاعد” و كانت الأغاني اللي فيه برضة مبعدتش كتير عن جو و أغاني الألبوم الأولاني.
بدأ فريق “كايروكي” مع وجود عدد كبير من الجمهور اللي مستني شغله و مزيكته المختلفة إنه يشوف الجمهور عاوز إيه و دا بداية الفشل لأن الناس حبت مزيكتك مش محتاج تشوف هما عاوزين إيه ؟؟ و دا ظهر في أغنية عبد الباسط حمودة و كايروكي “غريب في بلاد غريبة” في المزيكا الشعبي اللي إتقدمت بشكل ضحل جدا لمجرد إنها تعجب الشباب اللي بقا مش بيسمع غير شعبي حاليا و تاني حاجة لإن ببساطة فريق مزيكته قايمة على شخص واحد اللي بيكتب و هو مش شاعر و شخص واحد اللي بيلحن و هو معندوش ملكه التلحين .. فلما بيكون شخص مش محترف هو اللي قايم بالكتابة و التلحين هيوصل لمرحلة إنه قدم كل اللي عنده و كل اللي جاي هتكون مجرد محاولات شبيهة فاشلة.
إمبارح شوفت كليب “نفسي أفجر” فكرة تصوير الكليب جميله جدا شكرا للمخرج والشخص اللي فكر فالفكرة دي بالنسبة للمزيكا و التوزيع كانوا ناضجين إلى حد كبير مع برضة تحفظي على الأداء المشابه اللي في المزيكا .. أما بالنسبة للكلمات بتاعة الأغنية فياريت يا أمير يا عيد بلاش تكتب تاني .. ممكن تكون بتطلع أفكار حلوة للأغاني بس مش بتعرف توزن الكلمات في الأغاني .. جمل كبيرة و جمل صغيرة و مفيش ميزان و تاني حاجة إنت مش ملحن تقدر تلحت 20 أغنية مختلفين والناس تعرف تفرق بينهم .. لازم تغير يا الباند هيقع او يتحول لحاجة تانية إنت مكنتش عاوز الباند يوصلها في يوم من الأيام .. ودا ظهر في أخر ألبوم “السكة شمال” اللي مفيش ولا شخص من اللي كانوا بيسمعوك من أول ما بدأتوا سمعه .. كل الناس اللي سمعوه ناس سمعوكوا في وقت قريب .. حاول تجيب شعرا و تجيب حد يلحن حاجة تليق على صوتك .. لانكوا ببساطة مش باند و السلام إنتوا باند ناجح و لكن زي ما توقعتلكوا النجاح في يوم بتوقعلكوا دلوقتي الفشل في حالة الإستمرار حتى و لو بقيتوا بتنزلوا إعلانات للباند على اليوتيوب ومكسرين الدنيا ماركتنج و حفلات.
أساس 