هلأ لوين ..

اخيرا و بعد طول مده كنت عاوز اتفرج على فيلم هلأ لوين للمخرجه الجميله جدا ندين لبكي اتفرجت عليه امبارح

ندبن لبكي من طراز المخرجات اللي مفيش زيهم في مصر مع صغر سنها الا ان هي بتعرف تختار اعملها كويس و انتظروا فيلمها التالت .. طبعا مفيش كلام على الاخراج غير ان فيه بعض الراكورات ناتجه عن ان الممثل مبيبقاش عارف كان وضعه ازاي في المشهد اللي قبله فبيظهر الراكور و هو ان الممثل بيكون على وضع و الكاميرا تيجي من زاويه تانيه بيكون في وضع تاني

بالنسبه للقصه فالفيلم دا يعتبر عمل رساله كامله للمجتمع من شتى الطرق ..

رساله ضد التطرف الديني…و عرض ان ازاي البني ادم لازم يتعامل على انه شخص مفرغ او انسان بغض النظر عن دينه و دا اللي بينه الفيلم لما الستات قرروا انهم يبدلوا دين بعض المسلمه تبقا مسيحيه و المسيحيه تبقا مسلمه  علشان ميحصلش اي عراك او دم او تطرف ديني في القريه اللي كانوا فيها

رساله لدور المرأه في المجتمع و انها مش بس نص المجتمع دا ممكن تكون كل المجتمع .. لما عرض ان الرجاله هما اللي بيشيلوا سلاح و هما اللي ممكن يكونوا سبب في الدمار و الفساد و ان المرأه هي اللي كانت بتخبي الاخبار و بتخبي الاسلحه .. دا حتى لما الست اللي ابنها مات قررت انها متقولش انه مات علشان تحمي القريه بتعتهم من التطرف و ازاي انهم ممكن يعملوا اي حاجه علشان يمنعوا الدمار دا .. بصراحه حببتني في الستات اكتر مبحبهم

رساله لدور الاعلام .. على الرغم من ان دور الاعلام مهم الا انه سلاح ذو حدين فهو اداه لمعرفه كل اللي بيحصل حوليك الا انه ممكن يكون اداه للفساد و اداه للدمار .. ودا بان لما الستات بوظوا التليفزيون اللي القريه كلها بتتفرج عليه و حرقه  كل الجرايد لمجرد انهم عرفه ان فيه عمل طائفي حصل في لبنان في مكان ما و كانوا بيحولوا ان رجالتهم ميعرفهوش علشان ميكنش فيه اي طريقه للكره بينهم

بالنسبه للاغاني و الاستعراضات .. انا مشوفتش كده قبل كده ..و الله الموفق و المستعان

القول الفصل في حريه هذا العصر

صحيت انهارده الصبح لاقيت قدامي خبر بتاع حبس اسلام عفيفي رئيس تحرير جريده الدستور احتياطيا بتهمه سب و اهانه الرئيس

المهم في انك لما تيجي تلاحظ اراء الناس اللي بتعلق عالخبر دا تلاقي يا إما شخص مع  حبس اسلام عفيفي جدا لانه كداب و كتب كتير من القضايا اللي فعلا متحراش فيها الصدق .. يا إما شخص ضد حبسه من اساسه علشان حرية الرأي و العقيده و حريه البسكوته و ما الى ذلك من الحريات

طب ما تيجوا نفصص الموضوع واحده واحده كده ..

مبدئيا كده قانون اهانه الرئيس بتاع الخمسينات من ايام الملك دا لازم يتغير و يدخل تحت قوانين السب و القذف علشان يبقا الرئيس زيه زي اي مواطن انسان طبيعي في البلد دي .. و لو حد شتمه يروح هو اللي يرفع القضيه دي بسلامته محدش شغال عنده علشان الرئيس موظف مش بابا ها

تاني حاجة بقا – بره الرئيس بقا و الجو دا –  الاستاذ الكبير اسلام عفيفي كان كاتب حاجات في جريده الدستور في الصفحه الاولى صلاه النبي نانوس عين امه كان بيخترع و عايش في كوكب تاني .. في فرق بين حريه الرأي و التهجيس  في الحقايق .. حريه الرأي مفهاش كلام .. محدش يقدر يقولك تلت التلاته كام رأيك و انت حر فيه .. انما قلب الحقائق بدون دلائل محتاجه محاكمه بس مش بتهمه سب الرئيس بتهم تانيه

“تالت حاجة بقا و دي الاهم .. “ينحاكم الكل يا نسيب الكل

بمعنى ان طالما هنحاسب اسلام عفيفي علشان قال كلام غلط منغير دلايل يبقى نحاسب الحريه و العداله علشان قالو كلام غلط منغير دلايل .. زي بانديتا كده

بمعنى لو هنحاكم اسلام عفيفي علشان اهان الرئيس و قام بزعزعه الامن و الاستقرار يبقا الاولى نحاكم الاخوان اللي شتموا المشير في التحرير و كانوا بيحرضوا الناس على النزول ايام ما كان المشير هو الرئيس

رابع حاجة و دي الاخيره و النبي يا جماعه ما عاوز حد يجي يقولي دا ايام مبارك مفيش صحفي اتحبس و ابراهيم عيسى كان قاعد في بيته .. ما هو علشان حسني مبارك كان بيعمل الغلط بس مستخبي و علشان مش عاوز يقلب عليه الرأي العام لانه كان بيعمل الغلط و مش طالبه معاه حد يقعد ينخورله في كل حاجة و لو تفتكروا هو اللي عمله عفو عام اياميها علشان يبقا السيد الرئيس الاب الحنون بينما ابو الامراس لسه جديد و شكله كده مش خايف من النخوره وراه

و في الاخر احب اقول لابو الامراس .. اهدى شويه علينا كده يا باشا لو سمحت علشان انتا اصلا جاي ب 51 % يعني في ناس بيعتبروك ساقط فبلاش كلام كبير بقا و زعزعه و سب و قذف و كده و خلص فترتك و اتوكل على الله

 🙂 و احب اقول للناس .. و النبي قولوا الحق بلاش نظريه يا الكل يا مفيش .. بلاش يا انا مع اوي يا انا ضد اوي دي لمجرد اني بشجع مرسي او مع حريه الرأي  .. بلاش القفش وحياة ابوكوا .. و بس خلاص